KNews (တၢ်ပရၢဆူကညီဖိ)အဂ့ၢ်

ယၤ, စီၤတၤသူ, ယထံၣ်လၢပ၀ဲကညီဖိတဖၣ်အဂီၢ် လံၥ်လဲၢ်တအိၣ်အါဘၣ်. ယသ့ၣ်ညါဒၣ်ခီလၢ လၢပသိးပကျါ ပှၤလၢအကွဲးလံၥ်ကွဲးလဲၢ်သ့ အိၣ်အါဒ်အါဂၤ ဘၣ်ဆၣ်တၢ်လီၢ်လၢအ၀ဲသ့ၣ်ကဘိးဘၣ်ရၤလီၤအီၤအဂီၢ် တအိၣ်အါလၣ်ကဲၣ်စိးဘၣ်. ယထံၣ်တနီၤရၤလီၤအတၢ်ကွဲးလၢ Facebook အပူၤ ဒီးတၢ်သီၣ်တၢ်သဲအါလၣ်ကဲၣ်စိးအဃိ တနီၤလီၤဘၢကွံၥ်၀ဲ ဒီးတၢ်ရၤလီၤအီၤတတုၤယံၤယံၤဘၣ်.

လၢညါတၢ်ကွဲးဒ်သိးဒီး ကွဲၤကလုၢ်တဖၣ်ပထံၣ်ဘၣ်အီၤ ဘၣ်ဆၣ်မုၢ်မဆါတနံၤအံၤ တထံၣ်ဘၣ်လၣ်ကဲၣ်ဆိး တၢ်ကွဲးလီၤနံၤတၢ်(ဆီဖါကီၢ်) တၢ်ဟ့ၣ်နီၤခီနီၤလိၥ်သးတၢ်ထံၣ်ဒီးတၢ်သ့ၣ်ညါနၢ်ပၢၢ်တဖၣ်လၢၥ်ဘၣ်. ပှၤဆိၣ်လိၥ်သးကိးဃါလိၥ်သးလၢကလံၤကျါဒုပထံၣ်ဒၣ်ခီ ဘၣ်ဆၣ်တၢ်ပၥ်ဖျါထီၣ်တၢ်ထံၣ်ဒ်န့ၣ်တကလုၥ် ထိၣ်ဂဲၤထီၣ်တၢ်သူၣ်ထီၣ်သးဟ့လိၥ်သးအါန့ၢ်ဒံး တၢ်မၤအါထီၣ်တၢ်ဆိကမိၣ် တၢ်ပဲၤထံနီၤဖးတၢ်ဒံးန့ၣ်လီၤ.

ယနီၢ်ကစၢ်ဒၣ်ယဲ ယအၢၣ်လီၤလၢယတၢ်ဂံၢ်ဆံးဘါစၢ် လၢတၢ်ကွဲးပှၤကညီကျိၥ်အိၣ်ဒၣ်ခီ. ဘၣ်သ့ၣ်သ့ၣ်ကမ့ၢ်လၢ ယတၢ်ဖးဘၣ်ပှၤကညီလံၥ်လဲၢ်တဖၣ် တအိၣ်လၣ်ကဲၣ်ဆိးဘၣ် ဒီးလံၥ်လဲၢ်လၢအကလီၤဖးတခီ တအိၣ်အါအါစ့ၢ်ကီးဘၣ်. ဘၣ်ဆၣ်တၢ်ဆိကမိၣ်အံၤမ့ၢ်ဒၣ်တၢ်တဲပူၤလီၤကစၢ်သး ဒီးတအိၣ်ဒီးနီၢ်ကစၢ်တၢ်ဟံးမူဒါဘၣ်န့ၣ်လီၤ. အဃိအလီၢ်အိၣ်လၢပကဘၣ်ဒုးအါထီၣ် ဒီးဟ့ၣ်ဂံၢ်ဟ့ၣ်ဘါလိၥ်သးလၢကမၤအါထီၣ် တၢ်ကွဲးလံၥ်ကွဲးလဲၢ် လၢပသိးပကျါန့ၣ်လီၤ.

KNews (တၢ်ပရၢဆူကညီဖိ)ပျဲၢ်စီၢ်အံၤ ကမ့ၢ်ဒၣ်၀ဲတၢ်လီၢ်လၢပှၤကိးဂၤဒဲးဟဲပၥ်ဖျါထီၣ်တၢ်ထံၣ် ဟ့ၣ်နီၤခီလီၤတၢ်သ့ၣ်ညါတၢ်နၢ်ပၢၢ် ဒီးတၢ်လဲၤခီဖျိ ဆူပှၤလၢအတၢ်ခွဲးတၢ်ယၥ် တအိၣ်တုၤသိးလိၥ်သးတဖၣ်အဂီၢ်န့ၣ်လီၤ. ယနၥ်လၢတၢ်သူၣ်ထီၣ်ကီၢ်သူလ့ၤန့ၣ် တမ့ၢ်ထဲလၢပကဘၣ်ဒုးတၢ်လဲလဲဘၣ်. တၢ်သူၣ်ထီၣ်ကီၢ်သူလ့ၤပၣ်ဃုၥ်စ့ၢ်ကီးဒီး တၢ်သူၣ်ထီၣ်ကံၢ်စီ တၢ်ဟ့ၣ်တၢ်သ့ၣ်ညါ ဒီးမၤအါထီၣ်တၢ်သ့တၢ်ဘၣ်တဖၣ်န့ၣ်လီၤ.